7. Juni – A der Reception vo üsem Camping in Noosa hämmer no zwei wertvolli Tipps becho. Erstens hät sie üs en Camping in Hervey Bay vorgschlaga, wo üs au super in Sacha Fraser Island beratend und zweitens söllemer doch no uf em Weg nach Hervey Bay en Stopp in Tin Can Bay ilegga. Det chömend schins jeda Morga am 7:30 Delfin go en Caffi nä. Will üs der Nama vo dem Dörfli scho so guat gfalla hät simmer det denn au heragfahra. Miar händ en wunderschöna Sunnauntergang gnossa und sind denn früha go ligga, dass mer am nächsta morga au ja dia Delfin ni verpassend.

Am 7:15 simmer denn bi dem besagte Caffe gstanda und händ uf dia wunderbara, intelligenta nia schlafenda Tiarli gwartet. Und würkli wia versprocha sind punkt halbachti zwei wildi Delfin a das Caffe hera ds schwimma cho. Sie sind bis 10cm a einem hera cho, aber alanga hät ma sie ni dörfa. Es sind halt wildi und drum isch das strengstens verbotta gsi. Nachdems denn am 8i no gfüeteret worda sind, hämmer üs es gmüatlichs Plätzli am Meer gsuacht und hend det zmörgelet und au üsa verdianti Caffi becho.

Denn häts gheissa ab nach Hervey Bay zum üs en 4WD-Charra ds sichera zum uf Fraser Island ds ga.