8. – 11. Juni – Wo mer in Hervey Bay acho sind isch üses nöchste Ziel klar gsi. Jetzt wönd mer luaga wiä mer üsi Tour uf Fraser Island buached. In üsem Camping in Noosa hends üs gseit  mer müsset uf dä Scarness Camping und det nach dä Marilyn froga. Diä wüssi alles für Fraser. Mer hend aso dä Camping am Samschti agstüüret und d’Marilyn au grad am Empfang gha. Wo mer Fraser nur erwähnt hend, hets schu us ihre gsprudlet. Mer hend denn gmeint, mir würet gern selber fahre uf Fraser und alles uf eigeti Fust, sind üs aber nit so sicher gsi. Dä Phil (ihre Ma) hett denn däzwüschet gruafä, wenn mer chönget uf dä linke sitä fahre, denn seg da kai Problem für üs, und so hends üs alli Angst gno. J Mer hends üs den uf em Camping am Beach chöne gmüätlich mache und d’Marilyn het üs alli Möglichkeite zäme gstellt mit Vermieter, Camping oder nit und 1 bis 3 Tag Ufenthalt. Sie isch denn bi üs verbi cho und het üs alles erklärt.

Schlussendli hend mer denn 2 Tag buechet mit eigetem Wage und amä Zelt wo grad schu uf em Camping isch. Dä Phil het denn dä Uftrag gha üs in alles z’instruiere wo mer über d’tide (d’Fluat) muass wüsse, damit mer au am Beach chan fahre. Es sind viiiiiel Infos gsi…

Am Mäntig isch es denn los gange mit extra Chüählbox usgstattet. Hend am morge bim Vermieter no Videos und wiiter Hiwies müässe alose und denn hets gheissa, Fraser wir kommen!!!! Am eis vor nüni sind mer bi dä Nüni-Ferry acho. 😉 Scho hend mer diä erste Kilometer mit üsem Toyota Landcruiser gmeisteret und Fraser isch nöcher cho.

Acho uf Fraser hend mer dä 4WD inä tua, neu wieder müässa gschaltet fahre und scho hend mer Sand under dä Rädli gha. Mer sind in Urwald gstoche und sind uf ärä Piste gsi wiä mer üs das niä hettet chöne vorstelle. Scho sind diä erste Auto entgägecho und mer hettet bim uswich Mannöver dä Charre schu fast s’ersti mol versenkt. Uuuahhh… D Cordelia hets näbet dra scho no chli biiberet, während für dä Roman glaub en Buabätraum in erfüllig gange isch.

Als ersts hend mer dä Lake Wabby mit eigeter Düne im Rägewald bsuecht. Nachher isch es uf an d’Ostküste an Beach gange. D’Fluat isch am zrugg go gsi und mer hend dörfe fahre. Geeeiiilo… Aber scho sind diä erste Felse uftaucht. Easy, hets zerscht usgseh… den isch es umä ä Kurve gange, Auto sind Reihewiis entgägcho, es het nur Felse gha und wo mer do düre fahret hend mer üs nit so recht chöne vorstelle. Aber üse Landcruiser het jede no so grossi Stei gmeisteret. Adrenalin Pur.

Denn isch es am Strand no ufa in Norde gange. Bade im Elli Creek (en Süässwasser Fluss), bestune vomä Frack und bis zum Indian Head. Di hinä acho hend mer wellä zu dä Champagne Pools. D’Abzwigig det hindärä isch aber nur tüüfe, weiche Sand gsi wo mer grad mol stecke bliibe sind. Hinderschi isch es wieder usä und au dä zweit Versuach het nüt brocht. Hm… Mer hend denn zum Glück en Guide wo det au no gsi isch chöne Froga wa mer falsch machet. Gaaas geh und rechte Tourä ha het er gmeint und glachet! Guat, so hend mers gmacht! Vollgas und es het üs hi und her gschleuderet… aaaaber mer hends gschafft und sind belohnt worde mit ämä Bad in dä einzige Salzwasser-Pools und das bi Abig-Sunnä. J

Am Abend sind mer biz wiiter zrug ufämä Camping gsi, hend in Gsellschaft vu nette Australier und Dingos es BQQ gmacht und gnosse. Im verglich zu üsem Jucy isch üsi Zelt-Hütte grad es Appartment gsi. J

Am zweite Tag hend mer no bitz müässä warte bis mer hend chöne fürä fahre, weg dä Fluat. I däre Ziit hend mer ä chlini Wanderig zunärä Düne bi üs gmacht. Riiisig Sandlandschaft wieder zmitzt im Rägewald. J Am halb zwölfi hend mer denn chöne afange fürä fahre. Mer hend üs schu wieder uf diä coole Fahrte gfreut über d’Rocks und alles was üs gest no chli es mullmigers Gfühl gmacht het. Mer sind denn au nomel im Elli Creek üs go im Fluss fürä triebe lo.

In Euron vornä acho, sind mer wieder in Rägewald gstochä. Nachämä zwüschehalt bi dä Central Station isch es den zum bekannte Lake McKenzie gange. En See nur mit Rägewasser gfüllt. Glasklar und mer sind ganz ällei det am bädele gsi. Vu det us isch denn wieder richtig Ferry und zrugg ufs Festland gange.

Fraser Isand – Unbeschrieblich, Action pur und eifach meeeega cool!