5. Juni – Jetzt sind mer in Noosa und Noosa Heads acho. Nach dem mir bi dä Info verbi gluaget hend und diä üs meh schlecht als recht  uskunft gäh hend sind mer denn uf eigeti Fust dä nögst Camping go suacha.

In Noosa findet mer ganz schöni Buchte, en Nationalpark direkt am Meer und dä Noosa River wo au ins Meer mündet und hinä dra d’Noosa Everglades. Mer hend denn en ganz cool Camping direkt am Noosa River gfunda. Und bi däne tolle Lüt ar Reception hend mer denn au no chli Infos übercho zum Ort. Am Nomi sind mer d uf en Walk im Nationalpark und hend det au üse ersti Koala in freier Wildbahn gsichtet. Juhuuu! Und soooo herzig.

Am Abig hend mer mol wieder nit selber kochet und sind ins Städtli es Resti go suache. Do hend mer en tolle Fang mit em lustige Wirt gmacht. Es isch denn au Seafood uf dä Bstellig gstande mit Lobster für Cordelia und den Spiess für dä Roman. Zum Dessert het Cordelia denn au en Extra grosse Löffel übercho… 😉

Am zweite Tag hend mer üs es Kayak gschnappt und sind chli dä Noosa River uf und ab düset. Dur diä Kanäl und a dä schöne Hüsli und em hübsche Buschland verbi. Zwüschet durä sind mer auf uf dä Sandinseli zmitzt im Fluss gstrandet.

Am letschte Tag in Noosa hend mer üs no ä Stand Up Paddel Lektion inä zogä. Üsä Teacher isch den ganz super Typ gsi und het üs das in null-komma-nix bibrocht. Mer hend vu ihm au no wichtigi Insider-Tips zum drehen und einbeinig fahre glernt. Dä Roman het das denn aber doch bitz us em glichgwicht brocht und er het zwüschet inä no es chüähls Bad wellä nä. Üsa Teacher het sis Ziel erreicht, nämlich eina vo üs im Wasser ds gseh.  Es het üs aber mega Spass gmacht und mer hends schu voll im Griff. Dä nögste Fahrt staht also nix meh im Weg.