6. – 9. Juli – Jetzt hets gheisse, ab in Norde. Als nöchsts hend üs öpe 1‘000 km fahrt uf em Explorer Way erwartet. Scho nach wenige Kilometer zur Stadt us hend mer nur Stross und chli Buschland gseh. Es isch eifach grad us gange sowit mer het chöne luaga und no wiiter…

Nach öpe 450 km hend sich am Horizont wiä rundi Eier abzeichnet. Diä sind denn immer grösser und meh wordä und hend sich als mega cooli Steiformatione entpuppt. Mer hend diä Devil Marbles gfunda. Do hend mer denn natürlich en Stopp müässä mache und hend do au en mega coole praktisch gratis Camping Platz entdeckt. Mer hend üs denn entschlosse do z’übernachte. Mer hend zwor nit so genau gwüsst wiä warm das es do jetzt isch. Do mer aber über dä Wendekreis vum Steibock wieder überus sind, müssts jo wieder wärmer cho. Das isch denn definitiv au so gsi und mer hend Sunnäuntergang und au grad dä Sunnäufgang bi däne coole Stei gnosse und doch au s’eini oder anderi Foti gmacht. 😉

Am nögste Morge isch es denn beziite witer in Nordä gange, uf Mataranka. Do sind mer ziimli dä ganzi Tag gfahre, wiiteri 650 km. Am obig het üs denn aber in Mataranka chli Spa in ärä heisse Quelle erwartet. Genau s’richtige nach ärä so lange fahrt.

Am nögste morge hend mer das Mataranka no chli genauer agluaget und nomel so ä heissi Thermal-Quelle gfunda zum gnüsse. Chli wiiter hinä hend mer denn en ganz hübsche Bush-Camping entdeckt amä Krokodil-Fluss. Nach däne 2 Tag fahre hend mers üs denn do gmüätlich gmacht und üs immer mol wieder an üsere Badestell abküählt. D’Temperature sind jetzt nämlich grad chli gstiege und mer mag das chüäli Nass wieder sehr guat verträge. 😉 Dä Süässwasser-Krokodil sind mer zum Glück aber nit begägnet, obwohl diä üs angeblich nix machet. Am obed hend mer denn wiedermol es rechts Lagerfüürli chöne mache und üse Gnüsser-Tag usklinge lo.