3. – 12. August – Jetzt hend mir in üsem letschtä Hotel im „Nusa Dua Beach“ in Nusa Dua icheckt. Das liit ziimli im Südä vu Bali chli unterhalb vu Denpasar und uf dä andärä Sitä vum Surfer Beach Kuta. I dem riisä Resort sind mir jetzt für 9 Nächt bliibe und hends üs guat go lo. Do d’Begrüässig am erstä Tag durs Hotel und denn au dur üsi Reiseleitig ä chli z’wünschä übrig lo het, hend mer üsi Unternehmige denn jewiils selber organisiert. 😉

An einem Tag hend mer en Usflug in Elefante Safari Park gmacht. Det het üs den Ritt dur dä Dschungel uf em Ruggä vu dänä Dickhüter erwartet. Denn hend mer dä Elefantä bim spielä und badä chönä zuäluagä und hend au einige dörfä füättere. Det hets teils ganz jungi gha wo mer het chönä algange, streichlä und si hend immer glachet für einem. Dä eini het einem denn sogar immer umarmet. Es mega Erlebnis und mir hend üs fast nümä vü däne grauä Viehchli chönä losrissä. J

Do i jo jetzt es Tauch-Prevet im Sack han, ha i das natürli au schu müässä bruchä. 😉 Mit mim provisorische Uswiis hets en Usflug zumä Wrack vu dä US-Marinä gä wo ich han dörfä go tauche und s’Mami und Dömi denn go schnorchlä sind.

Sust hend mer immer mol wieder dä Beach chli gnosse und d’Welle wos bi dä Fluat amigs gäh het. Natürlich hend mer au diä nöcher Umgebig z’Fuäss erkundet und chli usserhalb chlini Märktli zum händälä und Massageangebot zu unglaubliche Priise gfundä.

Mir hend i dänä guat 3 Wuchä wahnsinnig viel erlebt. Diä ganze Idrück chönd mir üs bi üsärä meh als 24stündige Rückreis nomel chli dur dä Kopf go lo. Switzerland we come back!