15. – 19. Juli – Zwei Täg hemmer jetzt dä Krokodil chönna zualuaga wias bädelend und umajumpend. Jetzt isch für üs das au wieder ufem Programm gstanda. Üsers nächsti Ziel isch der Litchfield NP. En NP wos uuu viel schöni Wasserfäll  und natürlichi Pools söll ha, anschinend ohni Krokodil. Doch bevor miar üs ds erst mal so richtig hend chönna abkühala, isch es nomal brand heiss worda. Scho vo witem hemmer a dunkli Rauchwolka bim Igang vom Litchfield gseh. Grad am Strassarand het der Buschwald liechterlo brennt und miar händ zmizt dur dä stickig dunkel Rauch müassa fahra. Im Auto isch es rasant ziemli heiss worda. Miar hends denn dochno gschaft dur dia Flamma durazcho und so hemmer üs umso meh uf es abküahlends Bad an da Florenc Falls gfreut. Aschlüssend simmer zu da Rockholes. En herziga Bach wo über unzähligi Stufa gflossa isch und so überall schöni Pools zum bada bildet het. A paar Pools sind so tüf gsi, dass ma ohni Problem het chönna inachöpflera. Das hemmer denn au der ganz Namittag gmacht. Wills a so schön gsi isch simmer denn au gad deta ufem Outbackcamping go übernachta.

Am nächsta Morga nachera witera Abkühalig i dena Pools simmer ufa chlini Wanderig mit unzähliga Bademöglichkeita. Aber bis det hera het ma zerst es Stückli dur der Jungle müassa. A Frau isch det wia agwurzlet gstanda und het gmeint miar söllend uf kei Fall in dä Jungel inalaufa. Ihra sig gad a riesa Schlanga über de Weg krocha. Da mer aber jetzt doch scho öpa 7 Schlanga gseh hend hemmer dia Riesaschlanga au ni wella verpassa. Miar sind vorsichtig in der Urwald ina und hend immer wieder links rechts und oba gluaget. Und jedes mal wo sich es Eidechsli bewegt het, isch d Cordelia ind Luft gumpet und a miar klebet. Und denn hemmer sie gseh. Ganz gmüatlich isch a öpa 3m langi Phyton vom Weg in der Wald ina krocha. I han sie denn no es Stückli müassa verfolga dass es au es aständigs Fötali geh et. Aber biz gruslet hets mi scho au.

Am Namittag simmer no and Wangi Falls, dia bekanntista vom Park. Da hets es Seeli gha woma het chönna bada, under der Wasserfall sitza, vo da Felsa aba gumpa und ines Wasserloch im Felsa hocka, wo ds Wasser über 30° warm gsi isch. Miar hends richtig gnosssa und sind sicher 3h det am bädala gsi. Wo mer denn aber am nächsta Morga nomal hend wella det ina en Schwumm go tua, isch alles abgsperrt gsi. Am Gitter isch es Täfeli ghanget, dass gester im Pool Krokodil gsichtet worda sind. Ja hobla… und miar sind gester mit dena Fichli der ganz Tag am umaplanscha gsi, brrrrrr…

So hemmer üs denn entschieda der Tag ufem Camping ds verbringa und det der Pool bits gnüssa. Geg der Aba simmer no uf en churza Walk wo ma Wallabies het chönna gseh. Der Bushwalk isch am Schluss parallel zur Strass zum Camping verlofa. Wo miar zwei wia dia grösta Tourista mit Kamera so dur der Bush am laufa sind, nöcheret sich en Camper. Plötzlich fönd dia a hupa und winka und umajola. Es sind d Irene und der Pascal gsi wo uf ihrera Hochzitsreis sind. Bi Bier und Wii hemmer das Treffa denn usgibig gfiired bis spat ind Nacht ina (11i). Es isch huara gmüatlich und glatt gsi.

Am nächsta Tag hemmer ihna denn no es paar schöni Plätzli im Litchfield zeigt und sind geg der Aba zema uf Darwin, üsem letschta Ziel gfahra.