13. – 15. Juli – Nach dem mir üsä Chüähschrank in Katherine nomel gfühlt hend isch es denn ufä gange zum bekannte Kakadu Nationalpark. En Mittags-Stop hend mir bimänä Lookout über dä Kakadu gmacht. Vu det us het alles wo mer au gseh het, noni würkli spektakulär usgseh und mer sind bi recht heisse Temperature denn bis uf Yellow Water ufä gfahre wo mer denn au üses Camping-Revier bezoge hend. Yellow-Water isch es Füächtgebiet und statt ärä Tour uf em Fluss hend mir denn üsä Camping-Pool zum abchüähle bevorzugt. Am Abig hets nöch hinder üsem Auto plötzlich chli Ufruahr geh. Alli sind mit Taschelampe umägrennt. Het sich doch det hinä denn tatsächlich no ä recht ä schöni Brun-Wiess gstreifleti Schlange zeigt. Mit gebührendem Abstand hend mer diä denn natürli au no müässe go aluage. Brrr…
Am nöchste Tag hend mir üs wiiter ins Innere vum Kakadu vorgwagt. Verbi bi alte Felsemalerei und uf dä Suachi nach Krokodil in dä nöchi vo Ubirr. Mer hend üs det denn au no uf en Walk amä Fluss entlang gmacht. Zum Glück sind mer det erst chli später underwegs gsi und tatsächlich sind diä Kroks nümä fuhl im Schatte am schlofä gsi sonder hend sich bereits chli dä Fluss durab triebe lo. Isch denn scho chli es komisches Gfühl gsi so es „Saltie“ vu nöcherem z’gseh, aber cool. J Nach dem chlinä Abentür sind mir bis uf Ubirr, en schöne Felse mit ärä tolle Ussicht über d’Wetlands. Det hend mer denn au en schöne Sonnenuntergang chöne gnüsse. Leider sind mir nit ganz diä einzige mit därä Idee gsi. 😉
Do mer i dem Kakadu nirgends recht darf bade weg denä Kroks und es scho chaibe warm gsi isch, hend mer üs am nöchste Tag uf richtig Litchfield NP gmacht. Uf em Weg us dem Kakadu hend mer aber no en Stop bim Adelaide River gmacht. Det isch dä Touristä-Hit go „Jumping Crocs“ go aluaga. Das hend mer denn doch au no gmacht. Und es isch en mega Hit gsi. Mer sind mit em Boot nit 2 Minute usä gfahre sind scho diä erste Krokodil us dä Büsch uf üs zua gschwummä. Klar, diä hend wohl gwüsst das es jetzt was z’esse git. Diä sind bis ans Boot anä cho und mit chli Lockfuatter sind diä tatsächlich 2 bis 3 Meter us em Wasser jumpt. Und das nit nur eimol… Wooooow. Föteli hend mer gmacht wiä diä verruckte und sind zum stune nüme uscho.
