30. Juni – 4.Juli – Nach dem grandiosa Ufenthalt in Cairns het für üs a neus Abentür agfanga. Miar sind uf Alice Springs is Red Center gfloga. Scho vom Flugzüg us het alles rot glüchtet. Jetzt hät dia rot erda, der grüan Regawald ds Blaua Meer und dia gelba Stränd ersetzt. Und statt 28 Grad isch es jetzt numa no 18 Grad am Tag und 5 Grad ir Nacht, brrrr. Voller freud hemmer üsa neu Hochdachcamper abgholt und sind sofort zum ersta Ichaufszenter düset. Det hemmer sofort en überdachta schattiga Parkplatz gfunda. Und scho hets kroset und kratzt. I Aff han voll vergessa, dass üsa neu Camper kei chlina Jucy meh isch, sondern 2.65m hoch isch. So doof. I han mi anderst ufgregt und d Cordelia het mi fast nümm chönna abrega. Zum Glück isch der Chraz ni ganz so schlimm, agloset häts sich gha, as ob mer ds ganza Dach verlohra händ.
Nach era Nacht wia im Chüalschrank, simmer nomal zum Campervermiater und hend üses Missgschick bichtet. Er hät gmeit es sig halb so wild und het mi wieder chönna beruhiga. Derfür hemmer ihm gad no es Elektroöfali und zwei Schlafsäck chönna abschnorra. Ab jetzt hend üs dia chalta Nächt nütmeh chönna atua.
Mit allem nötiga usgrüstet und emena rechta Chraz im Dach isch es 500km zum Uluru/Kata Tjuta Nationalpark ganga. Am Aba hemmer bir Abasunna der Ayers Rock gnossa. Es wunderschöns Schauspiel. 500 Fötali später simmer denn in gheizta Camper go ligga.
Am nächsta Tag simmer zu da Olgas go wandera. Det hät denn d Cordelia sogar gmeint sie chönni der Chäserugg und alli sieba Churfirsta gseh. (gsehnder sie au?) Dass sie ni gad no behauptet het sie gsechi der Säntis….. Gäg der Aba hets denn no es Fotoshooting am Ayers Rock bir Abasunna gä. Zudem hemmer üs nach langer Überlegig entschlossa am nächsta Tag der Ayers Rock ds bestiga. Das isch zwar ni verbota, aber d Aboriginis, dia Iheimischa, bittet nä ni ds bestiga, da er für sie heilig isch.
Mit emena biz schlechte Gwüssa hemmer d Bestigig früha am Morga in Agriff gno und es het sich definitiv glohnt. Es isch fast wia amena Klettersteig gsi, nu dass alles rot glüchtet het. Nach ca. 3h und witera 500 Fotena simmer wieder am Fuass vo dem heiliga Berg acho und sind zum 300 Kilometer entfernte Kings Canyon ufbrocha.
