1. – 3. August – Nach dem mir üs vum Agus und dä Carla verabschiedet hend sind mer zerscht mol wieder überrascht wordä vu üsärä neue Unterkunft. Mer grad eigeti Boungalow-Hüsli übercho wo mer diä nögste 2 Täg hend chöne gnüsse. Mer sind da auch grad mol ans Meer wo mer dä schwarzi Sand in Augäschii gno hend. Zum z’Nacht hend mer üs denn au no en Platz im Resti direkt am Beach gsicheret. J Dä nögsti Tag hend mer mit ärä Yoga-Stund gstartet und sind denn chli an Strad go d’Sunnä und d’Welle gnüsse. Det hets au Kanus gha wo mer afach so het chönä nä und das han i denn natürli au müässä teste. In dä Welle sind mir den tip top mit dem Kanu gsurft. Hehe…

Am nögste Tag isch es für üs denn wiiter gange mit üsärä Reis jetzt dur Bali. Am Igang het bereits üsä neui Guide in traditioneller Kleidig uf üs gwartet. Chum sind mer igstiege het er au scho agfange verzelle und redä. Da isch ä rechti Plaudertäsche. D’Minute wo er nix gseit het bis uf Ubud het mer wohrschinli an einere Hand chönä abzehle. Üsäs Tagesziel isch uf jede Fall s’Kulturelle Städtli Ubud gsi. Uf Weg det hi sind mer dur Riesterassefelder, Berge und nebet wiitere Vulkän durä gfahre. Ein Stop hend mer ufämä Berg obä gmacht wo mer het chönä 2 Fledermüüs aluagä wo ganz zahm gsi sind. Und do han ich diä richtige Dragon Bats wo ich in Australie immer gsuacht hand glich no vu nöch gseh und sogar chönä alange.

Wiiter sind mer dur en Affäwald (wo natürli au no hend müässä haltä) bis zumä hinduistische Meerestempel. Dä isch uf d’Felsklippe usä baut wordä und chan nur ganz agluäget werdä wenn d’Fluat nit z’höch isch.

Bis mir denn in Ubud acho sind, isch es glich scho wieder dunkel wordä. Will üsä eigentliche Hotel überbuacht gsi isch hets für üs es Upgrade ins „Ubud Hanging Garden“ geh. Do hend üs eigeti Pool-Villas mit Privatpool und Terrasse erwartet. Luxus pur.

Am nögste Tag het üs denn ä Balinesischi Kochstunde wartet. Am morge sind mir uf dä Markt diä frischä Zuätatä go kaufe und denn isch es ab in diä offäni Kuchi wo mer ä Privatlektion übercho hend. Mer hend 2 ganz tolli Köch resp. Köchin gha wo üs alles super bibrocht hend. Es het denn au dementsprechend viel und nur guats z’esse geh. Will denn aber glich alles ä chli z’viel gsi isch, hend mer üs dä Rest grad kurzerhand ipacke lo und das am Obig in üsärä Upgrade-Villa gässe. Hend grad no chli ä Nachtsession an üsem Pool igleit. 😉

Am letschtä Tag in Ubud sind mer no uf ä Krüterwanderig dur dä Dschungel in dä Berge. Es isch ä tolli guat 2 Stündigi Tour gsi wo mer alli Frücht, Krütli und Gsundheitspflänzli kenne glernt hend, dur Höhlene glofä und z’mitzt dur d’Riesplantage spaziert sind. En super Abschluss, bevors nacher zu üsem letschtä Hotel in Nusa Dua gange isch wo mer jetzt no chli dä Strand und d’Sunnä gnüsset.