29. – 31. Juli – Dä ersti Vulkanbsuach hend mer no mit Jeep und dä Rössli bewältigt. Als nögst isch uf zum Mount Ijen gange und det ufä sind mer z’Fuess. Zäme mit es paar wiitere Touriste und dä berüähmte Schwefelträger hend mer üs am morge uf dä Weg zum Krater gmacht. Ä ganz ä schöni Tour wo mer dobä mit ärä unglaubliche Sicht uf en blau-grüäne See belohnt wordä sind. Aber en chaibe Dampf isch us dem Krater ufägstiege und in kurzer Ziit het sich d’Farb vum See und au d’Sicht immer wieder veränderet. Und det us dä tüüfi sind immer wieder Manne mit schwer beladänä 2 Körb mit gelbe Stein – Schwefel – drin ufä cho. Tatsächlich bauet diä i dem giftige Schlund unä Schwefel ab und träget zwüschet 80 – 120 Kilogramm dä Berg abä… Dä Wind am Kraterrand isch für üs recht guat gsi und het diä giftige Dämpf eher vu üs weg gluftet.
Uf em zrugg weg zu üsem in Mitte vu Riesfelder glägnä Hotel hend mer no ä Kaffiplantage agluaget und denn dä Mittagsstop kurz vor em Hotel imä ganz chlinä iheimische Beizli gmacht. Det hend mer aber fantastisch gässe und s’eine Gricht het üs so guat gschmeckt das mer hend müässä frogä wiä diä das machet. Kurzerhand het üs d’Kuchicrew in d’Chuchi gholt und d’Dömi het grad selber müässe Hand alege und koche… 😉 Wills so guat gsi isch hend mer au am Obig grad nomel en Abstecher det anä gmacht. Det sind denn au dä Agust und d’Carla no mitcho well das üsä letschti Obed mit ihnä gsi isch.
Am negste morge isch es denn ab uf d’Fähre gange und übere uf Bali. Dodämit hend mer Java hinder üs los und sind uf dä negstä Insle acho. Und muass säge, Java isch definitiv au ä Insle und isch mer so viel sympathischer as als Programmiersprach. Hehe…
In Bali het üs dä Agust no bis zu üsem negste Hotel am Matahari Beach gfahre wordä. Det hend üs jetzt 2 gmüätlichi Täg mit Strand, Spa und gnüsse erwartet. A dem schwarze Sandstrand hend mer denn au schön badet und au probiert mit dä Kanus im Meer uf dä Wellä z’surfe. 😉
Das menü wünschi miar denn mal vor dömi wenn mer den wieder mal im toggi sind
He wieder super fotena, was hend denn iar für a guati kamera?
Sali er liebe
da gseht und tönt jo noch richtig schönä aber au erholsammi feriä. i freu mi scho, bis cordu mi mol zum esse i lad, i hoffe sie hät dä dömi guät zuä gluägät:-).
aber da mit dä churze hosä machät mehr eu allso au no und gnüssät dä heiss summer. i wünsch eu no viel spass und reisend guät
Andrea
Hehe… Merci Resi. Jo du wiä du im nögste Itrag gsehsch hend mer denn no chli ä grösseri Kochstund gnosse. I denke vu dem chöntet ihr denn schu au mol no profitiere
Ihr sind aus is Matahari, das isch es super Hotel..
di feine Fruchtspiessli am Pool und de super Z’Morgä… so schön. Gnüsseds wiiterhin!!!