Äffli, Rössli und en Vulkan

27. – 28. Juli – Nach dä lange Autofahrt nach Malang sind mer am nögste Tag nomel chli zrug zumä schöne Wasserfall. S’Highlight isch aber eher bim Parkplatz gsi, wo ä ganzi Affäbandi uf üs gwartet het. Und zwor Wort-wörtlich. 😉 Diä hend au uuh herzig usgseh und mer hend diä au grad nöcher müässä aluagä. Det hends denn aber eher scho mol chli zähn zeiget und mer hend scho chli Respekt gha. Dä Agus het üs denn aber es Pack Nüssli kauft und mer hend diä däne chöne füättere. Do het denn alles grad chli anderst usgseh und diä hend üs diä ganz liäb zu dä Händ uspickt.

Nach dem lustige Stop isch es wiiter chli in d’Höchi gange. Mer sind underwegs gsi zu üsem Hotel in Bromo wo mer am nögste Tag üsä ersti Vulkan go aluagä sind. Früäh ufstoh hets denn gheisse damit mer uf em Gipfel obä dä Sunnäufgang mit Sicht uf dä Mt. Bromo hend chönä bestunä. Mit em Jeep sind mer am morgä am drü ä Stund steil in Berg ufä gfahre. Mer sind aber definitiv nit diä einzige gsi. Dobä hets wo Autos und Lüt denn nur so gwimmlet. Naja… S’eine oder andere Bildli hets denn glich no geh und wo d’Sunnä denn cho isch hets au bald chli nolo mit dä Lüt und mer hend dä Blick uf ä Bilderbuachmässigi Vulkanlandschaft vor üs gha. Uh schön.

Nach em bestuhnä vum Bromo us dä Distanz isch denn au wiiter gange zum ganz zum Krater ufä z’stiege. Dodäzu hend mer aber nomel es rechts Stuck über diä Vulkanlandschaft müässä fahre. Unä acho hend üs ganz viel Ritter mit ihren Ross bedrängt. Mer hend kum zu üsem Jeep chönä usstiege. Isch äbe so gsi, das mer zum Vulkankrater ufä hend chönä ritä. Und do isch nit eifach es Ross für üs bereit gsi sonder mer hend üs vo all däne afach eis chönä ussuachä. Klar het jede wöllä das mer sis nähmet. I han denn no chli länger gha bis ich mich entschiede han. Do isch d’Helen mit ihrem Pony und em Guide schu uf em Weg gsi. Bi mir und dä Dömi hends denn aber schnell gmerkt das mer nit s’ersti mol uf däne Rössli hocket und mer hend grad frei hand übercho. Mer hend mit üsnä Pony chönä über diä Ebeni galoppiere und hend au d’Helen so wieder igholt. En heide Spass für üs. 😉

Diä letschtä paar Höhemeter zum Kraterrand hend mer no z’Fuass ufä müässä. I dä Lunge hets schu recht krazet und mer hend scho gmerkt das diä Luft do nöd nur gsund isch. Aber dä Ablick denn in Krater abä wo mer no diä Schwefel-Sauce gseht und alles no chli dampft isch denn scho sehr idrücklich gsi. D’Helen het denn sogar no so es Blumästrüssli in dä Süüri abä gworfä. Das söll angeblich Glück bringe.

Spöter sind mer mit üsnä Pony wieder gmüätlich dä Hügel ab und hend nomel en Spurt bis zum Auto higleit. Ämel ich und d’Dömi. D’Carla und d’Helen sind denn chli spöter imä gmüätlichere Tempo dähär cho.

2 Comments

Schreibe einen Kommentar

Deine E-Mail-Adresse wird nicht veröffentlicht.

Du kannst folgende HTML-Tags benutzen: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>