19. – 22. Juli – Jetzt höcklet mir no am Pool vu üsem Hotel und gnüsset diä letschtä Stunde in Down Under. Nach em Litchfield NP hend mer üs uf nach Darwin gmacht und no 2 Nächt ufämä „fründlichä“ und Muggä-Riechä Camping vor Darwin verbracht.

Am erste Tag hend mer üs am Morge uf in en Wasserpark gmacht wo do in Darwin afach gratis zur Verfüägig stoht. Das hend mer denn schu müässä gseh. 😉 Üs het ä rechti Rutschi mit 6 Spure zum Wettrenne mache erwartet. Aber au dä Chinder-Wasserpark hend mer mit Freud eroberet. Nachher isch es denn natürli z’vierte au no uf diä Rutschi gange wo mer denn es Renne um ä Glace gmacht hend. Zum d’Wettschuldä ilöse sind mer denn aber no in diä grossi City fürä und hends üs det an dä Wasserlagunä bim Meer vornä gmüätli gmacht.

Am nächste Tag hend mer denn üsä Charrä müässä suber putze und denn au schu müässä abgeh. Es bitz hend mer denn no biberet weg dem chaibe Kratzer im Dach. Aber das isch alles ohni Problem abgloffä und scho sind mer wieder ohni Auto underwegs gsi.

Mer hend üses Hotel denn ganz nöch vu dem besagtä Mindli Beach gno, wo am Obed en coole Sunset Market isch. Im Hotel acho hend mer doch tatsächlich no es Upgrade übercho. Statt amä hübsche Doppelzimmer het üs ä ganzi Wohnig erwartet mit Chuchi und am Gfrüürfach grösser als bi mir dihei. Das isch nach üsem Camper grad chli viel luxus gsi. Bald sind mer denn an dä Markt ufbroch wo mer denn verschiedeni Asiatischi und Australieschi Köstlichkeite go probiere und hend am Obig no en schöne Sunnäuntergang über em Meer gnosse. Das hend mer bis jetzt jo no niä gha.

Zum Abschluss hend mer no uf en Drink an d’Casion Bar näbet dra wöllä. Aber det het dä chaibe Securitas üs mit üsnä ID nit wellä inä lo. I weiss jo au nit wo dä sind Augo loh det das mer jünger wiä 18 usgseh hend? Naja… aber hend denn au no en Igang vur Strandsita her kennt. Sind mer halt um dä ganzi Komplex umä tschumplät und det inä. Det het denn niämert kontrolliert und so sind mer glich no zu üsnä Bierli und Martini cho. 😉

Bald gots jetzt denn uf dä Flughafe in Darwin und ab nach Java/Bali oder zrugg in d’Schwiz. Es isch afach ä hammer Reis gsi und Down Under wird üs wohl nit s’letscht mol gseh ha.