10. – 13. Juli –  Nach 1000km Outback het üs wieder mal d Zivilisation igholt. Miar sind ds Katherine gad achli überforderet gsi mit all dena Lüt und Ichaufszentra. Drum hemmer üs nu schnell uf em Visitercenter informiart, a Kanufahrt für in zwei Täg buachet, Zessa und Alkohol postet und sind möglichst schnell us dem stressiga Städtli wieder usa. Will mer zwei Täg uf üsi Kanutour in der Katherine Gorge händ müassa warta, simmer no zu da Edith-Falls gfahra, wo üs empfohla worda sind. Und das isch echt a hammer Empfehlig gsi. Nachemena halbstündiga Walk simmer zumena super schöna Wasserfall cho mit mehrera natürlicha Pools wo ma bestens het chönna bada und das bi über 30 Grad Lufttemperatur.  Das ganza isch wia a natürlicha Wasserpark gsi. Bädala, gega d Strömig sich zum Wasserfall herakämpfa, under der Wasserfall schwimma, uf d Felsa ufa klettera, vom Fels ins Wasser springa, sich vo der Strömig dur en Kanal triba la…. Miar hend a huara Spass gha und sind 2h im Wasser bliba.

Am Aba hemmer glaub beidi a biz en Sunnastich gha. Will wo mer nach em Zeh putz ufda WC’s vo üsem Outbackcamping wieder zrug zu üsem Camper hend wella, hemmer dä siach eifach nümma gfunda. Miar sind öpa 10min um der ganz Camping gloffa bis mer wieder vor üsem Büsli gstanda sind. Det acho hemmer gmerkt dass mer eifach zum WC usa cho sind und ohni ds studiara i dia komplett falsch Richtig gloffa sind. Ds WC-Hüsli hemmer jetzt drum wieder gseh und es isch numma öpa 20m vo üsem Platz entfernt gsi.

Nachera erholsama Nacht simmer mit  gschärftem Orientierigssinn ufa 4 stündiaga Walk zu anderna Pools, bits oberhalb vo üsem Wasserpark.  Au dia sind traumhaft schön gsi. Ufem Zrugweg simmer nomal in üsa „Wasserpark“ üs go abchüala. I hans denn ni chönna la, nebem Wasserfall dia ganz Felswand ufa ds chlettera. Wills oberhalb vo dem Wasserfall nomal en wunderschöna Pool gha het, aber dasmal menschaleer, hani minem Schatz grüaft sie söll au ufa cho. Tapfer isch sie miar hindanakletteret und miar händ d zweisamkeit a dem schöna Plätzli gnossa. Wo mer denn aber der Fels nebem Wasserfall wieder hend wella abeklettera isch det a grossi schwarzi Schlanga am umachrücha gsi. D Cordelia isch wia versteineret sta bliba, i han sie vom Felsa fast nümm chönna unetrscheida. „Da aba, a dera Schlanga verbi, gan i sicher ni!!!!“ Üs isch denn nüt anders übrig bliba as vo 4m vo dem Wasserfall obaaba ds gumpa. Das han i sowieso scho dia ganz Zit wella und jetzt hets mer d Cordelia au sogar erlaubt J und si isch tapfer hinana gsprunga ( sie het gar kei anderi Wahl gha).

So isch es denn Fritig worda und üsi Kanutour isch agstanda. Miar händ 4h Zit gha zum ina wunderschöni Schlucht hindera ds fahra. Da mer informiart worda sind, dass es im Wasser Freshis (Süasswasserkrokodil) hät, hemmer nach ihna gsuacht wia veruckt, händ aber bis zum End vor Schlucht leider keini gfunda. Drum hemmer üs det acho au gwagt zum en abkühalenda Schwumm ds tua. Uf em Zrugweg hemmer üs gmüatlich vor Strömig chönna zrugtriba la. Und so hemmer au bits meh Zit gha zum umaluaga. Und tatsächlich hät d Cordelia es Krokodil am Ufer entdeckt. D Cordelia isch wieder fast glich versteineret wia am Vortag i ihrem Kanu ghocket. Zum Glück hemmer Einzelkanus gha und so han i bis uf 3m a das faszinierenda Fichli hera chönna, bis es denn untertaucht isch.

Und öb das ni  gnuag gsi wär (Schlanga und Krokodil) hemmer am Aba vor üsera Campertür no 3 Wallabies (Kenguru) chönna beobachta. Ds chlinsta isch sogar bis zur usgstreckta Hand vor Cordelia hera und het sie abgschleckt. Ab dem Momant isch in Sacha Tiarli für d Cordelia alles wieder in Ornig gsi.