5./6. Juli – Nach dem mir wieder alles zrugg uf Alice Springs gfahre sind hend mer det üsä Chüählschrank nomel kurz gfühlt. Denn isch es uf en Abstecher in Weste zu dä West MacDonnell Ranges gange. Das isch ä ganze Felseketti mit verschiedänä ischnitt wo mer Wasserlöcher zum bade und schöni Schluchte findet. Mer sind an dem Samschtig denn grad mol diä chli meh als 100km bis hindärä zur GlenHelen Gorge gfahre. Det hend mir den au ufämä colle Outback Camping übernachtet und bi schönster Obigsunnä dä schöni Platz bi GlenHelen chöne gnüsse. Zum bade isch es aber definitiv no z’kalt gsi, obwohls scho mega glustig usgseh het. Mir sind drum glich au froh gsi, hend mer diä Nacht wieder Strom für üses Öfeli gha.

Am nöchste morge hend mir üs denn uf dä Weg zrugg gmacht und dä ersti Stop in dä Ormiston Gorge igleit. Und scho wieder het en herrlichte Platz uf üs gwartet, wo mer bimänä Rundweg obä an dä Schlucht hindärä und unä in dä Gorge mit dä Wasserpools wieder zrugg, gnosse hend.

Denn isch es wiiter zum Ellery Creek gange. Wieder het en chline Sandstrand mit ärä herrliche Badestell uf üs gwartet wo mer gmüätlich zmittag gässe hend. Do hend mers denn au mit bade wellä probiere. Aber nach 2 Minute drin stoh hend der d’Füäss scho so weh ta, das nit an meh z’denke gsi isch. Brrr…

Zum Schluss hend mir denn no ä Wunderschöni Schlucht bsuecht wo genau so usgseh het wiä uf dä Bilder… 😉