3. – 5. Juli – Uf em Weg zum Kings Canyon sind üs doch tatsächlich no 2 wildi Kamel über dä Weg gloffa. Sind wohl diä einzige Tier wo bi därä wärmi in dä Steppe umänand sind. Aber sie hend no recht schön posiert für es Foti. J

Acho im Kings Canyon Resort hets für diä ersti Nacht leider kei Plätz meh mit Strom gha und mer hend wieder chli müässä frühre. Naja… chli wärmer alegge und jetzt hend mer jo au no 2 Schlofsäck meh gha und denn isch das tip top gsi. Für diä zweiti Nacht hend mer üs denn aber schu chöne en Platz mit Strom sichere für üses Öfeli.

Am Morge isch es den ab in Watarrka Nationalpark zum Kings Canyon gange. Do hend mer zum ilaufe in chlinärä Walk d’Schlucht es Stuck hindere underno. Im zweite Teil sind mir uf dä Kings Rim Canyon Walk. Ä Wanderig uf dä Rand vum Canyon ufä und det rund umä. Vu unä het sich nit erahne lo was sich üs do für ä Landschaft wird offäbare. Aber isch gigantisch gsi. In guat 4 Stund sind mer do über Standstein-Stufe, Brüggli und zumä Wasserloch mit em Garten Eden glofa. Und ganz muatig hend mer üs den au chli nöcher en Abgrund anä gwogt… 😉

Do s’do au kai Empfang het mit em Natel hend mer mol Ziit gha üsi Blog-Iträg vorzbereite und alli Fotänä uszortiere. Sind chli viel gsi do in däre coole Umgebig… Und zum Reserviere für üsä nögst Camping hend mer denn au mol wieder es Münz-Telefon ufgsuacht.