23. – 30. Juni – Am Sunntig sind mir mit üsem Jucy denn in Cairns acho. Do sind mer als ersts mol chli go luaga wo diä coole Plätz sind, damit mir üs denn au es Hotel in dä nöchi chönd suachä. 😉 Cairns isch im Zentrum recht übersichtlich und so hend mer üs ä cools Zimmer grad an dä Esplanade gschnappt. Denn isch es mol uf s’Info Center gange zum go luaga was mer do alles chan mache. Do werdet jeni Tourä in alli Richtige abotä. Hm… Mer hend aber jetzt praktisch alles schu selber erkundet… bis natürlich uf s’Great Barrier Reef wo mer grad vor dä Hustür hend. Well mer in Cairns chli länger bliibet hend mir üs den recht spontan entschiede zum do üsi Tauchlizent in 4 Tag z’mache. Und scho isch buachet wordä.

Denn sind mer no üsä letschti Camping go suache. Det hend mer am nögste Tag üsä Jucy ganz suber pützlet und en denn müässä abgeh. L Bye, bye… Er isch üs also en ganz en tolle Partner gsi bi dä Erkundig vo dä Ostküste.

Nach dem mir denn üses Hotel bezoche hend simmer chli dä Pool go gnüsse und hend au am nögste Tag chli s’Wetter und Cairns gnosse. Nacher ischs denn am Mittwoch los gange zu üsem Tauchkurs. Am morge am halb achti sind mer abgholt wordä vum Sam. Er isch üse Instruktor gsi für diä nögste 4 Tag. En lustige chaibe Vogel. 😉 Diä erste 2 Täg hend mer mit Video luaga, schwere Test à la Australian-Art machä (das heisst d’Lösige hend mer näbet dra gha) und s’ersti mol tauche mit dä ganze Usrüstig im Pool verbrocht. Isch scho chli es komisches Gfühl gsi wo mer ds erstimol mit Weste, Tank, Brille und Flosse in dä Pool gjuckt sind.

Nach däne 2 Tag hets denn gheisse am Achti am morge ufs Boot und usä ufs Reef. Da dä Sam aber underwegs no es paar Ehrerundene igleit het und jenes vergesse het, sind mer denn halt erst am virtel ab Achti det gsi. Sie hend aber uf üs gwartet (i glaub diä hend das vum Sam schu chli kennt). Da isch es recht grosses Schiff gsi wo öpe 100 Lüt druf gsi sind. Diä meiste sind usä go Schnorchlä und es paar Gruppe sind go tauche. Das sind äbe diä coole gsi. J Wieder hets gheisse, alles Material fasse und denn isch s’Boot schu us em Hafe usä. Es het recht gwellet und bi därä 2-stündige Fahrt het dä Mage denn schu mol recht grumorät. Mer sind denn diä erste gsi wo vum Boot hend dörfä zum go schnorchlä und alles chli aluagä.

Am Elfi sind mer mit üsnä Azüg, Flossä und Brille parat gstande zum d’Weste und dä Tank azlege. Und zagg-zagg sind mer scho mit allem im Meer triebe. Alles ok? OK! Regulator inä und abtauche. Alles isch ratz fatz gange und mer sind itaucht ins Meer wo denn alles ganz ruhig gsi isch. Kai hektik meh und mer hend bi üsem erste Tauchgang afach chli chöne gnüsse und stunä. Unbeschrieblich!!! Und in dä erste 5 Minute hend mer doch tatsächlich scho en Reef-Hai gsichtet. Uaah… 😉

Nachärä gutä halbä Stund sind mer wieder uftaucht und hend ä Pause gmacht zum go Mittag esse. Denn isch es am Namittag zu üsem zweite Tauchgang gange. Det hend mer denn all üsi Sachä chli müässä übä. Balance hebe, Brille abziehe und wieder algege, Luft usä und wieder inä. Isch aber alles easy peasy gange und schu bald sind mer alls letschti wieder us em Wasser und es isch wieder zrugg nach Cairns ganga.

Todmüäd sind mer am Abig hai cho und sind denn au früäh go schlofa damit mer ready sind für üsä Final-Day. Am letschtä Tag hend mer üsä tüfsti Tauchgang bis öpe 17m gmacht. Coool und nomel chli alli Sache güäbt und zeiget. Mer hends alli voll im Griff gha. Üsi Gruppe a 7 Lüt isch mega cool gsi und mer hend uuu Spass gha mitänand. Ä richtigs Team und en super Instruktor wo üs super Tauche glernt het. Es isch eifach ä anderi Welt wo mer do itaucht und da Reef git soviel z’gseh.

Glücklich hend mer am abig alli mit Bravur bestande und sind jetzt zertifizierti PADI Open Water Diver. Das hend mer natürlich am Abig alli zämä no chli müässe go fiire!