21. – 23. Juni – Mit emena Auto ohni 4×4 chama an der Ostküsta maximal bis zum Cape Tripulation fahra. Üsers nördlichsta  Ziel an der Ostküsta hemmer aso jetzt in Agriff gno. Uf em Weg det hi simmer no kurz Kuranda, es herzigs Touristadörfli zmizt im Dschungle go aluaga. Det hets ei Markt nach em andera gha wo d Cordelia natürlich nümma ds bremse gsi isch. Wo i denn nach 2h shoppa langsam müad worda bin, hemmer beschlossa en Kafi go ds trinka. Und das isch es richtigs Erlebnis worda. Der Kafibsitzer wo chum no en Zahnd im Mul gha het, het sicher scho 20 Kaffi gha und isch völlig uftreit gsi. Er het nu umagschrauä und isch hinder sinera Teka hi und her ghüpft. Nach 10min sehr amüsanta Gspräch het ers denn glich no gschaft, üsi zwei Iskaffi ds zuabereita.

Geg der Aba simmer ufemena sehr schöna Camping in Cape Tribulation acho. Sofort het d Cordelia an der Reception der Flyer mit da Rössli gsichtet und i han kei Chance meh gha zum mi ds drücka. Ds Rösslirita hämmer für der nächst Namittag buacht. Aber zerst isch mal no a abentürlichi Nacht vor üs glega.

Am morga am zwei bini grüttlet und gschüttlet worda. Irgend öpis muass min Schatz in Panik versetzt ha. „Schatz, Schatz!!!!! Ghörsch du das au??“ Irgend öpis oder öpert het an üsers Auto klöpflet. I han mi eimal umtreit und versuacht witer ds schlafa. Doch es isch ni lang ganga bini wieder us minem friedlicha Schlaf grissa worda. „Schatz da usa isch öpis, öpert wo wot bi üs ibrecha oder es gruusigs Tiar!!!“ Will i eifach möglichst schnell han wella witerschlafa bini us em Auto usgstiga, drumuma gloffa, han das ekalhaft giftig grusiga Tiar vom Rückspiegel weggrissa, 3 mal über en spitziga Stei gschlaga und denn under der Schibewüscher klemmt. Ab denn isch ruha gsi und miar hend beidi endlich wieder chönna witerschlafa

Am nächsta morga, i han immer no biz es Lach auf da Stockzähnd gha, simmer drü Trails dur der Jungle go macha und hend üs erhoft, es paar würklich grusigi giftigi Tiarli ds gseh. Ussert es paar Rebhüaner und era grusiga Spinna hemmer den aber leider nüt gseh. Am Namittag simmer go Rössli rita. I han dia einzig Stute vo all dena 40 Rössli übercho und dia het scho am Afang nu seich im Grind gha. I han sie denn aber doch no in Griff becho und so isch der Ritt losganga. Zerst dur der Jungle und nacher amena wunderschöne menscheleera Strand entlang. Sogar der Galopp und Trab hani glernt und es het mer richtig Spass gmacht. D Cordelia hets natürlich mit ihra langjähriga Erfahrig voll im Griff gha und het jetzt sicher über mi biz gschmunzlet. Es isch en mega schöna zweistündiga Ritt gsi.

Am negste Tag isch es denn füäh zrugg richtig Cairns gange. Bi dä fahrt dur dä Wald hend mer doch tatsächlich no müässe en Stop riisse well üs es Kasuara-Wiibli mit 2 Junge über d’Strass grennt isch. Voll cool, jetzt hend mer diä Blau-Halsige – Strausseähnliche Tier au no live gseh.