17. Juni – Nach dä schöne Insle isch wiiter in Norde richtig Cairns gange. Do hend üs nomel paar 100 Kilometer Auto fahre erwartet. Üses wiiti Ziel isch Innisfail gsi und vu det us en rund Tour ins Inner Tabelland. Aber bis det hend mirs denn noni gschafft. Verbi an riesige Zuckerrohr-Plantage wo sich mol abgwechslet hend mit ärä Bananä-Plantage isch es vu Dörfli zu Dörfli gange. Das sind alles so chli chlineri Handwerker städtli. Am Schluss hets üs denn an diä goldige Stränd vu Mission Beach verschlage. Det hend mer nach däne Kasuara usschau ghalte und sind am Strand go Kokosnüss suache. Gfundä hend mer denn, aber keini wo sich guat aghört het.

Uf üsem Camping hend mer denn no ä Flyer vonärä Kayak Tour en River chli oberhalb vu üs dura gläse. Spontan hend mer det aglütet und für am morge am Achti es Kayak buachet. Früäh ufstoh hets denn gheisse, hend mer doch no über ä Stund müässä det ane fahre.

In Babinda isch üsä Action Tag den losgange mit ärä fahrt mit em Kayak dä Babinda River durab. Ganz ällei und zum Glück au ohni Krokodil. 😉 Zum Zmittag ässä sind mer denn chli oberhalb zunärä schöne Badestelle am Fluss mit ganz schöne Stei Formatione – The Boudlers. Det hend mer den badet und nochli entspannt. Uf dä Nomi isch es denn an d’Joephine Falls gange. En chline Spaziergang dur dä Rägäwald, under grusige grosse Spinne dura het üs zu däne Mehrstufige und ganz schöne Wasserfäll brocht. Und s’Highlight het üs unä a däne erwartet. Det hets über en glatte Stei us, wiä ä Rutschbahn geh wo mer denn beidi wieder zu chli Chind wordä sind und kum hend chöne ufhöre.

Müäd sind mer am obig wieder an en neue chline Strand. Det hetts denn gratis au no Kokosnüss geh. Isch zwor ä heidä Arbet gsi diä ufzbringe, aber däfür nacher umso besser gsi.