13. – 15. Juni – Nach üsem top Abentür uf Fraser hemmer üs scho uf es neus dörfa freua. Whitsundays, a wunderschöni Inslagruppa wo Segler us der ganza Welt aziet. Doch bis det hera isch es öpa 900km mim Auto uf em berühamta Bruce-Highway  ganga. Uf em Weg hemmer öpa 6 Oposums,  5 Känguru, 3 Wombats, 2 Koalas und a Python gseh, alli chli flächer als normal. Will mer üs noni gwöhnt gsi sind, so langi Streckena ds fahra, hemmer üs entschieda, ufemena Caravanpark am Bruce-Highway ds übernachta. Natürli hets det kei BBQ-Stell gha und drum hemmer üsi Burger ir Bratpfanna uf üsem Jucy-Kocher müassa grilliara.

Am nächsta Morga isch es denn ir aller hergottsfrühani ab nach Airlie-Beach zum Tor nach Whitsunday ganga. Det acho hemmer möglichst schnell a Segeltour wella buacha, damit mer scho am nächsta Tag ins Meer stecha chönd. Leider hets für der nächsti Tag gar kei mehrtägigi Segeltoura im Agebot gha, drum hemmer üs doch für en Eitagestour entschieda. Und ds segla hemmer gad au gla und hend a Speedboot-Tour buachet.

Zum glück hemmer das mim segla la. Will am nächsta morga wo miar uf üse Highspeedcruiser sind, isch kein Huch vo Wind uma gsi. Alli Segelbötli hend d Segel dunna gha und sind mit ihrna 10PS Motörli umatugeret. Dia hets schön agschissa wo miar mit üsna 900 Rössli verbibretteret sind. Der erst Stop hemmer anera wunderschöna Bucht gmacht mitemena traumhafta Riff. Det hemmer für 1.5h dörfa go schnorchla. Lüchtendi Farba hend dia Koralla und Fischli gha. Und d Cordelia het sogar a riesigi Muschla entdeckt, dia isch sicher 1mx1m gsi, wunderschön. Üsa Guide het sie denn allna müassa go zeiga und d Cordelia isch a uuu stölzi gsi.

Mit üsem gelba Flitzer isches witer nach Whiteheaven-Beach ganga. Eina vo de 10 schönsta Stränd uf der Welt, wia ma üs gseit het. Und für üs isch es definitiv der schönschti gsi, wo mer je gseh hend. Kristallklars Wasser und schneewissa Sand. A perfekts Plätzli für es Fotoshooting J Nach emena abkühalenda Bad hets es mega Zmittagsbuffet gä mit viiiiiieeeel Fleisch und feina Salät. Nu dia riesiga Eidechsa (Lizard), wo dia ganz Zit um d Füass umagschlicha sind, händ üs bim Essa biz abglenkt. Nach em Esssa simmern  dur der Jungle zumena Lookout und hend denn der super Strand no biz gnossa. Und scho isch wieder es super Erlebnis ds End ganga.