4. Juni – Wo mer am Mäntig obed zum Dreamworld usä sind hend mer üs spontan entschiede glich no ä stückli z’fahre. Wo ane hend mer aber leider nit würkli gwüsst, afach richtig Noosa. Mer hend denn i üsem gschiede Buach no gläse und üs spontan für „Mooloolaba“ entschiede. Da tönt so lustig und het sich au sust no guat aghört.

Dos do glich schu recht früäh (füfi – halb sechsi) dunkel wird, hets denn halt nit glanget zum bi Tagesliächt det azcho. Aber gfundä hend mer das hübsche Dörfli glich. Nur hend alli Camping schu am Sechsi zua gmacht :-(. Do sind mer kurz chli gfrustet gsi und hend denn aber glich am füf vor siebni no ä offni Tür gfundä.

Nach dem mir üs iquatiert hend, sind mer no an d’Promenade go es hübsches Resti suache. Do hend mer denn sehr glück gha und ganz öpis feins gfundä.

Am nögste morge sind mir denn richtig Beach und üs det en andere Camping direkt am Strand gschnappt. Det hets denn en erste Beach-Tag und bade in dä Welle gäh. Es isch richtig schön waaaarm und sunnig gsi.